சென்னையில் கனமழை கொட்டித் தீர்த்திருக்கிறது. குறிப்பாக, வடசென்னையில் குறுகிய நேரத்தில் வரலாறு காணாத மழை பெய்துள்ளது. இந்நிலையில், நள்ளிரவில் பொதுப்பணித்துறை அமைச்சர் ஆதவ் அர்ஜூனா சென்னை ரிப்பன் பில்டிங்கில் பத்திரிகையாளர்களை சந்தித்திருந்தார்.
ஆதவ் அர்ஜூனா பேசியதாவது, ‘வடகிழக்கு பருவமழைக்கான முன்னேற்பாடுகளை கடந்த இரண்டு மாதங்களாக செய்து கொண்டிருக்கிறோம். நேற்று பெய்திருப்பது வழக்கமான மழை இல்லை. வடகிழக்குப் பருவமழை சமயத்தில் சென்னையில் மொத்தமாக 69 செ.மீ மழைதான் பெய்யும். ஆனால், நேற்று மாலை 6 மணியிலிருந்து இரவுக்குள் 35.2 செ.மீ மழை பெய்துள்ளது. மேக வெடிப்பு என சொல்கின்றனர். அதைப் பற்றிய தகவல் கிடைத்தவுடன் பகிர்வோம்.
இப்போதைக்கு கட்டுப்பாட்டு அறை 24 மணி நேரமும் செயல்பட்டுக் கொண்டிருக்கிறது. மக்கள் 1913 என்ற எண்ணுக்கு எப்போது வேண்டுமானாலும் தொடர்புகொள்ளலாம். ஒவ்வொரு மண்டலத்திலும் அதிகாரிகள் தயாராக இருக்கிறார்கள்.
15000 மாநகராட்சி ஊழியர்கள் களத்தில் இருக்கிறார்கள். முதலமைச்சர் விஜய் ஒவ்வொரு மணி நேரத்துக்கும் மழை குறித்த அப்டேட்டை கேட்டுக் கொண்டே இருக்கிறார். இவ்வளவு பெரிய மழை பெய்திருப்பதால் அடுத்த 10 நாட்களுக்கு நாம் எதற்கும் தயாராக இருக்க வேண்டும். பழைய கட்டடங்களில் வசிக்கும் மக்களை தற்காலிக தங்கும் இடங்களுக்கு மாற்றும் வேலையிலும் ஈடுபட்டிருக்கிறோம். சென்னையிலுள்ள பழமையான ஹவுஸிங் போர்டுகளின் புள்ளிவிவரங்களையும் எடுத்துக் கொண்டிருக்கிறோம். மக்கள் மழை பெய்யும் போது வீட்டை விட்டு வெளியே வர வேண்டாம். பாதுகாப்புக்காக மின் தடையையும் செய்வோம். மக்கள் எதுவாக இருந்தாலும் 1913 என்ற எண்ணை அழைக்கவும்.’ என்றார்.
