மேகதாது: `ஒரு சொட்டு நீர்கூட தமிழ்நாட்டுக்கு கிடைக்காமல் போய்விடும்!’ – சௌமியா அன்புமணி
“கர்நாடக அரசு மேகதாதுவில் அணை கட்டினால், தமிழ்நாட்டுக்கு வர வேண்டிய தண்ணீரில் ஒரு சொட்டு நீர்கூட வராது. உச்ச நீதிமன்றத் தீர்ப்பின் படி கடை மடை மாநிலத்தின் அனுமதி இல்லாமல் எந்த அணையும் கட்ட முடியாது. கர்நாடகாவைக் காட்டிலும் தமிழ்நாட்டில்தான் காவிரி அதிகமாகச் செல்கிறது. நமக்கே அதிக உரிமை இருக்கிறது” – சௌமியா அன்புமணி, பாமக
காங்கிரஸ் உறுப்பினர்கள் முயற்சிக்க வேண்டும்! – இந்திய கம்யூனிஸ்ட்
“கர்நாடக காங்கிரஸ் அரசோடு தொடர்பு கொண்டு அணை கட்டுவதை தடுக்க நமது காங்கிரஸ் சட்டமன்ற உறுப்பினர்கள் முயற்சி செய்ய வேண்டும்.” – இந்திய கம்யூனிஸ்ட் எம்.எல்.ஏ. தளி ராமச்சந்திரன்
மேகதாது அணைக்கு எதிரான முதல்வரின் தனித் தீர்மானம் – விசிக, காங்கிரஸ், ம.ஜ.க ஆதரவு!
கர்நாடகா அரசு மீது அவமதிப்பு வழக்கு தொடர வேண்டும் – தமிமுன் அன்சாரி
“தமிழ்நாடு அரசின் இந்த தீர்மானத்தை வரவேற்கிறோம். கர்நாடக அரசுக்கு எதிராக உச்ச நீதிமன்றத்தில் தமிழ்நாடு அரசு நீதிமன்ற அவமதிப்பு வழக்கு தொடர வேண்டும். இந்த விவகாரத்தில் மத்திய அரசு தலையிட்டு நடவடிக்கை எடுக்க வேண்டும். மேகதாது அணை கட்டுவதற்கு கர்நாடக விவசாயிகளே எதிர்ப்பு தெரிவிக்கின்றனர். எனவே காமராஜர் முன்வைத்த திட்டப்படி ராசிமணல் பகுதியில் புதிய அணை கட்ட வேண்டும்.” – மஜக, தமிமுன் அன்சாரி
மேகதாது: `மக்களுக்காக ஓரணியில் நிற்போம்’ – தனித் தீர்மானத்தை முன்மொழிந்த முதல்வர் விஜய்
தமிழ்நாடு சட்டமன்றக் கூட்டத்தொடர் தொடங்கியிருக்கிறது. இதில் மேகதாது அணை விவகாரம் தொடர்பாக தனித் தீர்மானத்தை முன்மொழிந்து உரையாற்றிய முதல்வர் விஜய், “மேகதாதுவில் அணைகட்ட முயற்சிக்கும் கர்நாடக அரசுக்கு கடும் எதிர்ப்பைப் பதிவு செய்கிறோம். கர்நாடக அரசின் திட்ட அறிக்கையை மத்திய நீர்வளக் குழுமம் பரிசீலிக்கக் கூடாது. காவிரி படுகை மாநிலங்களின் ஒப்புதல் என்றி எந்த திட்டத்தையும் கர்நாடகா மேற்கொள்ளக் கூடாது. கொள்கை நிலைப்பாட்டில் வேறுபாடு இருக்கும். ஆனால் மக்களுக்காக கட்சிகள் ஒன்றிணையும்… மக்களுக்காக ஓரணியில் நிற்போம். விவசாயிகளுக்காக மக்களுக்காக ஒன்றாக நின்றே ஆக வேண்டும். கர்நாடகம் நீதிமன்றத் தீர்ப்பை மீறி அணை கட்ட முயற்சிக்கிறது. அதை அனுமதிக்கக் கூடாது!” என்றார்.
ராகுல் காந்திக்கு பிறந்த நாள் வாழ்த்து! – முதல்வர் விஜய்
“எனது அன்புச் சகோதரர், மாண்புமிகு மக்களவை எதிர்க்கட்சித் தலைவர் திரு. ராகுல் காந்தி அவர்களுக்கு இனிய பிறந்தநாள் நல்வாழ்த்துகள். இந்தியத் திருநாட்டின் முன்னேற்றத்திற்காகவும், மக்களாட்சி மாண்புகளைக் காத்திடவும், அனைத்துத் தரப்பு மக்களின் நலன்களுக்காகவும் தொடர்ந்து குரல் கொடுத்துவரும் தாங்கள், நல்ல உடல்நலத்துடனும், நீண்ட ஆயுளுடனும், தங்களின் அனைத்து முயற்சிகளும் வெற்றியடையவும், பொதுவாழ்வில் சிறப்புடன் பணியாற்றிடவும் வாழ்த்துகிறேன்.” – முதல்வர் விஜய்
மேகதாது அணை: சட்டமன்றத்தில் தீர்மானம்!
தமிழ்நாடு சட்டமன்றக் கூட்டத்தின் இரண்டாம் நாளான இன்று இடதுசாரி தலைவர் நல்லகண்ணு, திரை பிரபலங்கள் பாரதிராஜா, ஆர்.பி. சௌத்ரி ஆகியோரது மறைவுக்கு இரங்கல் தெரிவித்து தீர்மானங்கள் நிறைவேற்றப்படவுள்ளன. ஆளுநர் உரைக்கு நன்றி தெரிவிக்கும் தீர்மானத்தை, பேரவை துணைத் தலைவர் முன்மொழியவுள்ளார். இது தவிர, கர்நாடக மேகதாது அணைக்கு எதிராக முதல்வர் விஜய் தனித் தீர்மானம் கொண்டுவரவுள்ளார். மேகதாது அணை கட்டுவதற்கான கர்நாடக அரசின் முயற்சிக்கு எதிர்ப்பு தெரிவித்தும், அந்த அணை திட்டத்துக்கு எந்தவித அனுமதியும் வழங்கக் கூடாது என மத்திய அரசை வலியுறுத்தியும், அரசின் தனித் தீர்மானத்தை முதல்வர் முன்மொழியவுள்ளார். இது தொடர்பாக பேரவையில் விவாதம் நடத்தப்படுமெனவும் தெரிவிக்கப்பட்டுள்ளது.
