உக்ரைன் விவகாரம், அமெரிக்கா-ஈரான் இடையிலான வரலாற்றுச் சிறப்புமிக்க ஒப்பந்தம் உள்ளிட்ட முக்கிய உலகளாவிய சவால்கள் குறித்து விவாதிக்க ஜி7 தலைவர்கள் பிரான்சில் கூடியுள்ளனர்.
இந்த உத்தியோகபூர்வ விவாதங்களுக்கு மத்தியில், இந்தியப் பிரதமர் மோடிக்கும், இத்தாலி பிரதமர் ஜார்ஜியா மெலோனிக்கும் இடையே நிகழ்ந்த சுவாரஸ்யமான சந்திப்பு சமூக ஊடகங்களில் மீண்டும் ‘மெலோடி’ புயலைக் கிளப்பியுள்ளது.
மாநாட்டில் பங்கேற்ற அமெரிக்க அதிபர் டொனால்ட் ட்ரம்ப உள்ளிட்ட உலகத் தலைவர்கள் அனைவரும் குழுப் புகைப்படம் எடுப்பதற்காக வரிசையில் நின்றபோது, பிரதமர் மோடியும் மெலோனியும் ஒருவரையொருவர் கைகுலுக்கி வாழ்த்து தெரிவித்துக் கொண்டனர்.
அப்போது, தங்களது சமூக ஊடகப் பிரபலம் குறித்து பிரதமர் மோடி மெலோனியிடம் புன்னகையுடன் குறிப்பிட்டார். அதற்குப் பதிலளித்த இத்தாலி பிரதமர் மெலோனி, “ஆமாம், இன்ஸ்டாகிராமில் நாம்தான் மிகவும் பிரபலமான ஜோடி!” என்று நகைச்சுவையாகக் கூறினார். இது தொடர்பான வீடியோ தற்போது இணையத்தில் தீயாய் பரவி வருகிறது.
கடந்த மாதம் ரோமிற்கு அரசுமுறைப் பயணம் மேற்கொண்டிருந்த பிரதமர் மோடி, இணையத்தில் தங்களை வைத்து உருவாக்கப்படும் ‘Melodi’ (Meloni + Modi) என்ற மீம்களைக் குறிப்பிடும் வகையில், இந்தியாவின் புகழ்பெற்ற ‘பார்லே மெலடி’ (Parle’s Melody) மிட்டாய் பாக்கெட் ஒன்றை பிரதமர் மெலோனிக்கு அன்பளிப்பாக வழங்கியிருந்தார்.
இந்த இனிப்பான தருணத்தை மெலோனி தனது சமூக ஊடகப் பக்கத்தில் பகிர்ந்து, “பரிசுக்கு நன்றி” என்று பதிவிட்டிருந்தார்.
அந்த வீடியோவில், “பிரதமர் மோடி எனக்கு மிகவும் சுவையான ஒரு மிட்டாயைப் பரிசாகக் கொண்டு வந்துள்ளார்” என்று மெலோனி கூற, பிரதமர் மோடி புன்னகையுடன் “மெலோடி” என்று அதன் டாக்லைனை நினைவூட்டும் வகையில் குறிப்பிட்டார்.
2023-ம் ஆண்டு நெட்டிசன்களால் வேடிக்கையாகத் தொடங்கப்பட்ட இந்த ‘மெலோடி’ என்ற சொல், இன்று உலகத் தலைவர்கள் இருவரின் இயல்பான நட்புறவைக் குறிக்கும் சர்வதேச ட்ரெண்டாக மாறியுள்ளது.
கடந்த 2024 மற்றும் 2025-ம் ஆண்டு ஜி7 மாநாடுகளின் போதும் “ஹலோ ஃபிரண்ட்ஸ், ஃபிரம் மெலோடி டீம்” என்று மெலோனி பகிர்ந்த செல்ஃபி வீடியோக்கள் கோடிக்கணக்கான பார்வைகளைக் கடந்து சாதனை படைத்தது குறிப்பிடத்தக்கது.
